[Dezaoito]
Tras tantos anos de vetos e de desvelos
ollos pechados con cegueira artificial
ocultada a nitidez nas entrañas
pegada a noite nestas orellas de burro
tras tantos séculos de véus
até que un dia de sol acendestes tua luz.
Tras outro milagre ateu
ousado foi o teu salto tan natural
teu fondo calar de contado foi latexo
de inquisidores estouparon os teus íris
e agardaba eu degoirante
como a catarata a seu antídoto:
chegaron teus dardos verdes
e mais tuas labaradas
logo xa vexo.
Convincente hoxe varres-me da man
guias-me co agudo xugo desa inocéncia
cara a quen sabe cal travesia
entre tantos arrabeos atravesados en min.
Fig. Aldara g-18